Трамп Иранның маңызды нысандарын атқылау мүмкіндігін жоққа шығармайды

None
None
ВАШИНГТОН. ҚазАқпарат – АҚШ президенті Иранды АҚШ және америкалықтарға қарсы бағытталған іс-әрекеттен аулақ болуға шақырды. Дональд Трамп өзінің Twitter парақшасында осылай деп мәлімдеді, деп хабарлайды ҚазАқпарат.

Сенбі күні Америка президенті өзінің аккаунтында «Иран әскери қолбасшы Касем Сүлейманидің өлімі үшін АҚШ-тың белгілі бір нысандарына соққы жасау туралы өте батыл айтып отырғанын» сөз етті.

«Ұзақ жылдар бойы Иран қиындық туғызып келді. Бұл ескерту болсын. Егер Иран америкалықтарды немесе америкалық нысандарды атқылайтын болса, біз де қазірден бастап Ирандағы 52 нысанды көздеп отырмыз (бұл нысандар Иранның көп жыл бұрын тұтқынға алған 52 америкалықты білдіреді). Ол нысандардың кейбіреуі Иран үшін, иран мәдениеті үшін аса маңызды. Соққы осы нысаналарды және Иранды көздейді, бұл өте жылдам және өте күшті соққы болады. АҚШ қорқытып-үркітуге енді шыдамайды!», - деп жазды АҚШ президенті.

Еске сала кетейік, екі күн бұрын Бағдат халықаралық әуежайына жасалған ракета шабуылынан 8 адам көз жұмды. Ракеталар «Аль-Хашд аш-Шааби» шиит жасағына қарсы бағытталған болатын. Кейіннен бұл америкалық Пентагонның операциясы екені белгілі болды.

Айта кетейік, ракета шабуылынан қаза тапқандар арасында ирандық Ислам революциясы әскерлері корпусының арнайы мақсаттағы «Аль Кудс» қарулы күштерінің қолбасшысы Касем Сүлеймани де бар.

Осы жағдайдан кейін мұнайдың әлемдік нарықтағы бағасы қымбаттады.








Соңғы жаңалықтар