Токио-2020: Бүгін Қазақстан қоржынына медаль түскен жоқ

Бүгінгі жарыс күнінің қорытындысы бойынша Қазақстан қоржынындағы медальдердің саны өзгерген жоқ – 3 «қола» бар.

Жұрт «алтын алады» деп үміт артқан Василий Левит испаниялық қарсыласынан нокаутпен жеңілсе, «Қазақсатынның салмағы» - 69 келіде өнер көрсеткен Абылайхан Жүсіпов америкалық қарсыласынан өте алмады.

Су добынан ерлер құрамасы бүгін екінші жеңілістің дәмін татса, таэквондошылар Руслан Жапаров пен Жансель Дениз екінші кездесуінде сүрініп, жарысты ерте аяқтайтын болды.

Дзюдода медальден дәмелі болған Дидар Хамза да елге ерте оралатын болды.

Теннисші қыздар арасында табанды өнер керсетіп келе жатқан Елена Рыбакина ертең ширек финалда бәсекеге түседі.

Сонымен, Токио Олимпиадасының сайтындағы соңғы мәлімет бойынша, медальдер кестесінде үш қола медалі бар Қазақстан 47 орынды Украинамен бөлісіп тұр. 46 орында – бір «күміс», бір «қоласы» бар Түрікменстан. Бүгін медаль алған мемлекеттердің саны 52-ге жетті.

Көш басына 10 алтын, 3 күміс, 5 қола медаль алған жарыс иелері – Жапония шықса, 9 алтын, 8 күміс, 8 қола медалі бар АҚШ екінші орынға түсті. Үштікті 9 алтын, 5 күміс, 7 қола медаль иеленген Қытай түйіндеп тұр.

Сонымен, 27 шілдеде медаль алған мемлекеттердің жалпыкомандалық көрсеткіші мынадай:

1. Жапония - 10-3-5.

2. АҚШ - 9-8-8

Қытай - 9-5-7

4. Ресей - 7-7-4

5. Ұлыбритания - 4-5-4

6. Оңтүстік Корея - 3-2-5

7. Аустралия- 3-1-5

8. Канада - 2-3-3

9. Франция - 2-2-3

10. Германия - 2-0-3

Биыл дүбірлі додада 33 спорт түрінен 339 медаль жиынтығы сарапқа салынады. Айтулы аламанға жер бетіндегі 206 мемлекеттен 11 мыңнан астам спортшы қатысып жатыр. Қазақстандық 97 спортшы күншығыс елінде спорттың 28 түрінен бақ сынайды.

Еске салсақ, Токио Олимпиадасы 23 шілдеде басталды. Ол 8 тамызда мәресіне жетеді. Бұған дейін Қазақстан құрамасы алты Жазғы Олимпиадада бақ сынады. Жалпы алғанда 21 алтын, 28 күміс, 64 қола медаль алды.