19:51, 26 Ақпан 2021 | GMT +6
Теннис: Александр Бублик Сингапур турнирінің жартылай финалына шықты
НҰР-СҰЛТАН. ҚазАқпарат - Қазақстанның бірінші, әлемнің 46-ракеткасы Александр Бублик Сингапур ATP турнирінің жартылай финалына шықты, деп хабарлайды ҚазАқпарат тілшісі.
Қазақстандық теннисші ширек финалда әлемнің 61-ракеткасы, жапониялық Есихото Нисиокамен күш сынасты.
Бірінші партияда есеп 4:3 болған мезетте А.Бублик брейк жасап, сосын өз геймін де алды - 6:3.
Екінші сәтте есеп 1:1 болғанда, Бублик тағы да брейкке қол жеткізіп, өз геймін жіберген жоқ - 3:1. Тағы бір брейк 5:2. Ақыры ол жеңіс нүктесін қойды - 6:2.
Бәсеке 1 сағат 13 минутқа созылды.
А.Бублик финалға шығу үшін әлемнің 76-ракеткасы, молдовалық Раду Алботпен таласады. Ол ширек финалда әлемнің 35-інші, осы доданың 1-ракеткасы, франциялық Адриан Маннариноны 6:3, 6:4 есебімен тізе бүктірді.
Еске сала кетейік, бұдан бұрын А.Бубликтің Сингапур жарысын жеңіспен бастағанын, А.Недовесовтің Нұр-Сұлтан турнирінің финалына шыққанын жазған болатынбыз.