Татарстандық дәрігерлер коронавируспен күреске қолдау көрсету үшін Өскеменге келді

Шығысқазақстандық дәрігерлерге Ресейден келген анестезиолог-реаниматолог, рентгенолог, пульмонолог, инфекциялық госпитальдің дәрігерлері мен қызметкерлері көмектеседі. Дәрігерлер тобын Татарстан Республикалық клиникалық ауруханасы бас дәрігерінің медициналық қызмет көрсету жөніндегі бірінші орынбасары Марсель Миннулин басқарды.

«Бұл сапар – біз үшін екі ел дәрігерлерінің арасында тәжірибе алмасу ғана емес, сонымен қатар коронавирусты емдеуде бір-бірімізге көмек көрсету. Коронавирус – дұрыс жүргізілуі тиіс сатылық ауру. Вирустың «сатылық сипаты» бар болғандықтан, пациент жағдайының нашарлайтын кезеңдері болады. Ең бастысы – бұл күндері дұрыс әрекет етіп, науқасқа қажетті препараттар енгізу, аппаратқа дұрыс қосу. Бұл әрекеттер оң нәтижесін береді», - деп атап өтті Минуллин.

Еске сала кетсек, Шығыс Қазақстан облысының әкімі Даниал Ахметов Татарстаннан мамандарды тарту үшін Татарстан президенті Рустам Миннихановпен келіссөздер жүргізді.

Атап өтейік, облыста төсек-орын қорын қажетті жабдықтармен жабдықтау үшін ауқымды жұмыстар жүргізілуде. Бүгінде мұндағы өкпені жасанды желдетудің (ӨЖЖ) 196 аппараты, 57 цифрлық рентген-аппаратына қосымша өкпені жасанды желдетудің 50 аппараты, 10 рентген-аппараты сатып алынған. Сондай-ақ 200 монитор, 200 инфузомат, үш ЭКМО, 178 пульсоксиметр, 12 ӨЖЖ, соның ішінде балаларға арналған ӨЖЖ екі аппараты, бір компьютерлік томограф сатып алу жоспарланған. Сондай-ақ, жедел жәрдем автомобильдерінің паркін 216 көлікке көбейту жоспары бар.