Таразда жаңа әлеуметтік дүкендер ашылады

None
None
ТАРАЗ. ҚазАқпарат – Жамбыл облысының әкімі Бердібек Сапарбаев Тараз қаласындағы сауда нысандарын аралады. Алдымен аймақ басшысы әлеуметтік павильондардың жұмысымен танысты, деп хабарлайды ҚазАқпарат тілшісі.

«Тараз» ӘКК» ҰК» АҚ дүкендерінде әлеуметтік маңызы бар тауарлар азық-түлік дүкендеріне қарағанда арзанырақ сатылуда. Айталық, нан — 55 теңге, қарақұмық жармасының келісі —315 теңге, қант — 190 теңге, пияз — 55 теңге. Бағалардың төмендігіне қарамастан, мұнда ұзын-сонар кезек жоқ.

«Біз аз қамтылған отбасыларға көмектесеміз десек, әсіресе орынды дұрыс таңдауға көңіл бөлуіміз керек. Әлеуметтік павильондардың санын 15-ке арттырудың жолын ойластырыңыздар. Сонымен қатар, олардың сыртқы дизайнын да өзгерту керек», — деп тапсырды Бердібек Сапарбаев.

Бұдан соң облыс әкімі әлеуметтік дүкен жанындағы «Smart» супермаркетіне ат басын бұрып, нанның бағасына назар аударды. Қазір бір бөлке нан 83 теңгеден сатылуда. Өткен айда наубайшылар ұнның қымбаттағанын алға тартып, нан бағасын 95 теңгеге көтерген болатын. Алайда, аймақ басшысының тікелей араласуымен әлеуметтік маңызы бар өнімнің бағасы қайта төмендетілді. Сөрелерді бір шолып шыққан Бердібек Сапарбаев өңірде өндірілетін тауарлардың аз екеніне қынжылыс білдірді.

Содан кейін ол тағы бір әлеуметтік павильон болуы тиіс дүңгіршекке бас сұқты. Бірақ мұнда арзан тауарлар емес, сыртқы жағында жазылған жазуға қарағанда, лағман әзірлейтін орын тұр. Есігі тарс жабық. «Тараз» ӘКК «ҰК» АҚ Басқарма төрағасы Олжас Қаржауов дүңгіршектің жабық тұрғанына бір жылға жуық уақыт болғанын айтты. Жақын арада павильонды қаланың басқа ықшамауданына ауыстыру жоспарлануда екен.

Ал, «Корзинка» желісінің супермаркетінде нан 78 теңгеден сатылуда. Облыс әкімі с ауда орнында өңірлік өнімдердің бар-жоғын тексерді. Мұнда Меркі ірімшігі зауытының айраны басқа өндірушілердің ұқсас тауарларына қарағанда 5-10 теңгеге арзан.

«Жамбыл облысында өндірілген тауарлардың үлесі жалпы көлемнің шамамен 35 пайызын құрайды. Олардың арасында шұжық, сүт, ет өнімдері бар. Әр апта сайын біз тауарлардың қол жетімділігін арттыру үшін түрлі акциялар өткіземіз», — деді дүкен директоры Қарлығаш Сатанова.

Б. Сапарбаев облыста өндірілетін өнім көлемін ұлғайтумен қатар, бағаның негізсіз

көтерілмеуін қадағалау қажет екендігіне назар аударып, қала әкімдігі мен ауыл

шаруашылығы басқармасына нақты тапсырмалар жүктеді.

Соңғы жаңалықтар