14:26, 21 Қаңтар 2021 | GMT +6
Талдықорғанда қоғамдық көлік отқа оранды
ТАЛДЫҚОРҒАН. ҚазАқпарат- Талдықорғанда көшенің қақ ортасында қоғамдық көлік отқа оранды. Автобус толықтай жанып кетті. Абырой болғанда зардап шеккендер жоқ, - деп хабарлайды ҚазАқпарат тілшісі.
«228-ші бағыттағы автобус Назарбаев даңғылының бойында отқа оранды. Алдын ала болжам бойынша, өрт сымдардың қысқа тұйықталуынан болған. Көлік жанып кетті. Зардап шеккендер жоқ», - деді Талдықорған қалалық көлік және автомобиль жолдары бөлімінің басшысы Нұрбақыт Алтынбеков.
Бөлім басшының айтуынша, автобус «Трансталл» жауапкершілігі шектеулі серіктестікке тиесілі. Қазіргі уақытта қызыл жалынға оранған көлік аталған серіктестіктің аймағына жеткізілген. Өртті төтенше жағдайлар қызметінің мамандары сөндірген.