Талдықорған маңында көлік апатына түскен шағын автобустың жолаушысы қайтыс болды
«25 қараша күні ауруханаға жеткізілген 1955 жылғы Қарабұлақ ауылының тұрғыны 26 қараша күні таңғы сағат 7:10 шамасында қайтыс болды. Әйел адам ауруханаға өте ауыр халде түскен. Дәл қазіргі уақытта Көксу аудандық ауруханасында көлік апатынан зардап шеккен 4 адам жатыр. Олардың жағдайы орташа деп бағалануда», - деп мәлімдеді Алматы облыстық денсаулық сақтау департаментінің баспасөз қызметінен.
Естеріңізге сала кетейік, 25 қараша күні Алматы-Талдықорған тас жолында жолаушы тасымалдайтын шағын автобус көлік апатына ұшырап, 7 адам ауруханаға түскенін хабарлаған болатынбыз. Жол-көлік оқиғасы Көксу ауданына қарасты Балпық би ауылына жақын маңда болған.
Анықталғандай, микроавтобуста жүргізушіні қосқанда барлығы 17 адам отырған. Болжам бойынша, көлік жол жиегінен шығып кетіп, аударылған.