СҚО-да полицейлер жүргізушілерге хаттаманың орнына, сыйлықтар берді
Инспекторлар жүргізушілерді тоқтатып, хаттаманың орнына жадынамалар, ал жолаушы балаларға сыйлықтар сыйлады. Жыл бойы полицейлер ірі жедел-профилактикалық іс-шаралар мен акциялар кешенін өткізді. СҚО ІІД жергілікті полиция қызметінің бастығы Қанат Айтбаевтың айтуынша, басты мақсат - жол қозғалысы қатысушыларының қауіпсіздігін қамтамасыз етіп, апаттардың алдын алу болып табылады.
Шалақын ауданында балалардың қатысуымен акция ұйымдастырылып, Сергеевка қаласының мектептерінде білім алатын оқушылар флешмоб өткізді. Түрлі-түсті кеудеше киген балалар полиция инспекторларымен бірге жол қозғалысының қатысушыларына ЖҚЕ сақтау тақырыбындағы брошюралар мен буклеттер таратты. 2016 жылдың 11 айында СҚО жолдарында 204 жол-көлік апаты тіркеліп, соның ішінде 36 адам қаза тапса, 261 зардап шеккен.