СҚО-да Айыртау ауданы карантинге жабылып, кіріп-шығуға тыйым салынды
Аудандық шұғыл штабтың мәліметінше, Айыртау ауданы бас санитар дәрігерінің қаулысына сәйкес 18 маусым сағат 00.00-ден бастап карантин шаралары күшейтіледі. Ауданның шекарасы бойынша блокпостар қойылып, ауданға кіріп-шығу шектеледі.
Коронавирус инфекциясының таралуына тоқтау салу мақсатында туристік демалыс орындарының жұмысы тоқтамақ. Көрші-қолаңға, туыстарға үй-үйді аралауға және отбасылық іс-шараларды өткізуге тыйым салынады. Алайда көшеге еркін шығуға рұқсат етіледі, бірақ екі және одан көп адам бірге серуендегенде қашықтықты сақтап, маска кию міндеттеледі.
Мамандардың айтуынша, мерекелік, спорт, ойын-сауық мәдени-бұқаралық іс-шараларды өткізуге тыйым салынған. Сондай-ақ жағдай түзелгенше компьютерлік клубтардың, балалардың сауықтыру лагерлерінің, мектеп жанындағы лагерлердің, караоке, бильярд, фитнес және жаттығу залдарының қызметі тоқтатылады.
Қоғамдық тамақтану нысандары сағат 10.00-ден 22.00-ге дейін, ал сауда орындары сағат 20.00-ге дейін ғана жұмыс істемек.
Мамандар тұрғындарды қалыптасқан жағдайға түсіністікпен және жауапкершілікпен қарап, маска мен дезинфекциялау құралдарын пайдалануды сұрайды.
Жалпы СҚО-да 16 маусымдағы жағдай бойынша коронавирус инфекциясымен 125 адам тіркелген, оның 51-і емделіп шықты.