СҚО басшысы мен аудан әкімдері футболдан сайысты
Петропавлда мемлекеттік қызметшілер арасында дәстүрлі спартакиада басталды. Биыл оған 27 команда қатысып жатыр. Спартакиаданың салтанатты ашылу рәсіміне СҚО әкімі Құмар Ақсақалов қатысты.
«Мемлекеттік қызмет өте жауапты жұмыс, білім мен жоғары мәдениеттілікті талап етеді. Мемлекеттік қызметшiлер саламатты өмір салтын ұстанып, басқаларға үлгі көрсету керек»,- деді өңір басшысы.
Спартакиада спорттың алты түрінен: волейбол, стол теннисі, гір көтеру, тоғызқұмалақ және дойбыдан өтеді. 1 мыңға жуық мемлекеттік қызметші екі күн бойы сайысады.
Шараның ашылуынан соң «Қызылжар» және «Солтүстік» командалары арасында шағын футболдан жолдастық кездесу өтті. Футбол алаңына Құмар Ақсақалов пен аудан әкімдері шықты. Ойын 2-1 есебімен облыс әкімі ойнаған «Қызылжардың» пайдасына аяқталды.
