Шымкентте науқастарға орын жоқ деп әлеуметтік желіде бейнеролик таратқан дәрігер жағдайды түсіндірді

None
None
ШЫМКЕНТ. ҚазАқпарат- Шыментте науқастарға орын жоқ деп әлеуметтік желіде бейнеролик таратқан дәрігер жағдайды түсіндіріп өтті.

Бейнероликті түсірген дәрігер Арман Хамзин науқастардың жағдайына алаңдап, осындай әрекетке барғанын жеткізді, деп хабарлайды ҚазАқпарат тілшісі.

«Өздеріңізге мәлім, үш айдан бері алғы шепте жұмыс істеп келеміз. Бұл – өте ауыр. Науқастарды көргенде, тіпті психоэмоциялық жағдайлар болады. Осы орайда өз денсаулығымыз бен отбасымыз үшін де алаңдаймыз. Ал кеше әлеуметтік желіде тараған бейнероликке тоқталсам, дәл қазіргі таңда пневмониямен ауырған науқастардың саны өсті. Бұл жағдайды қалыпта ұстау үшін жан-жақты жұмыстар жүргізіліп, стационарлық орталықтар ашылуда. Аталған оқиға болар кезде науқасты инфекциялық ауруханаға жатқызу туралы координация берген. Бірақ біз аурухана алдына келгенде жедел-жәрдем көліктерінің көбейіп кеткенін көрдік. Инфекциялық ауруханада орын жетіспеушілігі туындады. Яғни, бізге диспетчерлік орталық дұрыс бағыт бермеген. Ал науқас екі жақты пневмонияның ауыр түрімен ауырған, жағдайы нашар еді. Сол себепті науқасты жедел орналастыру қажет болатын. Осы уақытта жағдай ушықты. Науқастың халі нашарлай берді. Оның өміріне алаңдап, бейнероликке түсірдім. Содан көп ұзамай, мәселе шешіліп, науқасты қайда орналастыру туралы хабарлама келді. Осы ретте бұл түсірілімнің әлеуметтік желіде тарап, халықтың дүрліккенін қаламағанымды айта кетейін. Енді алдағы уақытта мұндай әрекеттер қайталанбайтынын жеткізе отырып, кешірім сұраймын!»,– деді Арман Саятұлы.

Сондай-ақ, бейнеролик иесі бұл жағдайдан кейін таңға дейін жұмыс істегендерін және сол күні диспетчерлік орталық қызметінде келеңсіздік туындамағанын айтты. Бұл ретте Шымкент қаласының әкімі Мұрат Әйтенов те бейнероликке байланысты өз пікірін білдірді.

«Мүмкін дәрігерлер кінәлі емес те болар. Өйткені жәдел жәрдем қызметі бойынша шақыртулар кейде саябырсып, кейде күрт өсіп кетеді. Осылай шақырту тым көбейген жағдайда болған жайтты халық дұрыс түсінбей, «Шымкент қаласындағы ауруханалар науқастарға медициналық көмек көрсете алмай отыр» деп дүрлігуде. Бірақ әлеуметтік желілерде тарап жатқан бұл ақпараттар қисынға келмейді. Сондықтан, халыққа дұрыс ақпараттар таратуға тырысамыз», – деді қала әкімі.

Брифинг соңында Шымкент қалалық Жедел жәрдем станциясы бас дәрігерінің орынбасары Шолпан Оспанова БАҚ өкілдері тарапынан бейнеролик төңірегінде қойылған сауалдарға жауап берді.

«Бейнеролик бойынша айтсам, бұл жағдайда жедел жәрдем көмек көрсететін қызметкерлердің жіберген қателігі бар. Бүгінде аталған жайт жөнінде кінәлілер анықталу үстінде және оларға шара қолданылады. Осы ретте әлеуметтік желілерде Шымкент қаласындағы медициналық қызмет көрсету мамандарының қызметі бойынша тарап жатқан келеңсіз ақпараттардың жалған екенін жеткізгім келеді», – Шолпан Қабылқызы.


Соңғы жаңалықтар