21:35, 06 Маусым 2021 | GMT +6
Шымкентте күшті желден үйлердің шатыры ұшып, көліктің үстіне құлады
ШЫМКЕНТ. ҚазАқпарат - Шымкентте күшті желдің зардаптары анықталып жатыр, деп хабарлайды ҚазАқпарат қалалық әкімдіктің баспасөз қызметіне сілтеме жасап.
«Қазгидрометтің» мәліметіне сәйкес, Шымкентте 6 маусым сағат 18.25-18.36 арасында екпіні 15-28 м/с жететін қатты жел соққан.
Салдарынан бірнеше мекенжайда үйлердің шатыры ұшты.
Атап айтқанда, Байтұрсынов көшесі 90А 5 қабатты үйдің 40 шаршы метр болатын шатыры ұшып, Қонаев даңғылы 1 үйдің ауласына құлаған.
«Тoyota Corolla» маркалы автокөлікке зақым келтірді.
Сондай-ақ, Солтүстік шағын ауданы 52-үйдің шатыры қатты соққан желден ұшып кеткен.
Оқиға орнына төтенше жағдай қызметінен 2 техника мен 8 қызметкер жіберілді.
Қаза болғандар мен зардап шеккендер жоқ. Жағдай тұрақты.