Шығысқазақстандықтар «Маска тағыңыз» акциясын бастады

Челленджге қатысуға ниет білдіргендер әлеуметтік желілердегі жеке парақшаларында Stories салып немесе өз өмірінен мысалдар келтіріп, хештегпен пост жазуда. Әрбір жарияланған жазба - жеке адамның тарихы.

Біреу өз тәжірибесін бөліссе, енді бірі көрген және естіген оқиғаларын айтады. Көбінің тәуекел тобына жататын егде жастағы ата-анасы, кішкентай балалары бар.

«Үйден шықпас бұрын міндетті түрде өзіме және балама маска тағамын. Күз кезінде адамдар ауруға жиі шалдығады. Егер әркім өз денсаулығына жауапкершілікпен қарайтын болса, бұл індетті оңай еңсереміз. Достарым мен таныстарым мұның қаншалықты маңызды екенін көріп, ойлансын деген ниетпен челленджді қолдаймын. Маска киіңіз! Қолыңызды жиі жуыңыз! Антисептик қолданыңыз!» - дейді Өскемен қаласының тұрғыны Елена.

Коронавирус инфекциясының екінші толқыны бүгінде көптеген елдерде басталып та кетті. Мысалы, көршілес Ресейде ауырғандардың саны қазірдің өзінде қайтадан жүздеген мыңға жетіп отыр.

Аймақ билігі ауруханалардағы орын жетіспеушілігінің туындауына жол бермеу, барлық қажетті зерттеулерді уақтылы жүргізу үшін қолдан келгеннің бәрін жасауда. Алайда, өз денсаулығымыз үшін жауапкершілік әрқайсымыздың өз мойнымызда екенін ұмытпағанымыз жөн.

«Мұны челлендж қатысушылары да жақсы түсініп, қолдап отыр. Санитарлық нормалар мен әлеуметтік қашықтықты сақтау және маска кию - бұл коронавирус инфекциясымен қатар маусымдық тұмаудың да алдын-алудың ең тиімді тәсілі. Белсенді шығысқазақстандықтар маска киіп, жақындарыңызға қамқорлық жасауға шақырады», - делінген ШҚО ақпарат орталығының мәліметінде.