11:33, 28 Шілде 2020 | GMT +6
Шығыс Қазақстан облысында қоқыс төгетін орын өртеніп жатыр
ГЛУБОКОЕ АУДАНЫ. ҚазАқпарат – Шығыс Қазақстанда қоқыс төгетін орын орын тағы өртеніп жатыр, деп хабарлайды ҚазАқпарат ШҚО Төтенше жағдайлар департаментінің баспасөз қызметіне сілтеме жасап.
Ведомствода кеше түнде сағат 22:12-де өрт сөндірушілерге Глубокое ауданының Опытное поле кентіндегі қоқыс тастайтын жерде 1 га аумақты қамтыған өрт болып жатқаны туралы хабарлама келіп түскен. Жалынның бидай егістігін шарпу қаупі бар екені айтылған.
«Оқиға орнына №7 өрт сөндіру бөлімінің 12 қызметкері мен 5 өрт сөндіру көлігі жіберілді. Жалын сағат 5:15-те ауыздықталды. Қазіргі кезде өртпен күрес жүргізушілер оны толық жою жұмыстарын жалғастырып келеді», - деп түсіндірді ШҚО ТЖД-нен.
Қоқыс тастайтын орынның өртенуі мүмкін екі себеп қарастырылуда – бұл абайсыздықтан болған немесе әдейі өртеу.