ШҚО мешітінде күннен қуат алатын панельдер орнатылды

ҮРЖАР. ҚазАқпарат - Шығыс Қазақстан облысындағы Мақаншы ауылдық орталық мешітінде күннен қуат алатын панельдер орнатылды. Атап өтілгендей, мұндай жоба Орталық Азия аймағындағы мешіттер арасында алғаш рет қолға алынып отыр, деп хабарлайды ҚазАқпарат тілшісі.

Шымкент қаласының «DALA SOLAR» жауапкершілігі шектеулі серіктестігі өткен жылы Қазақстан мұсылмандары діни басқармасына бұл жөнінде ұсыныс айтып, мүфтият өз тарапынан рұқсат берген. Аталмыш компания өз қаражатына қайырымдылық жасап, қазір Үржар ауданына қарасты Мақаншы ауылының орталық мешітіне құны 5 млн теңге тұратын күннен энергия алатына панельдер орнатуда. Күн тақтайшалары сағатына 5 киловат энергия өндіреді.

«Үкімет жасыл энергияны дамытуды көздеп отыр. Қазіргі таңда баламалы энергия алу әлемнің дамыған мемлекеттерінде жүзеге асып жатыр. Мысалы, Германия, Аустрия, Чехия, Қытай, Америка сынды дамыған мемлекеттерде балама энергия алу жақсы жолға қойылған. Біз де өркениетті елдердің осы тәжірибесін сіңірсек деген мақсат қойдық. Қазіргі таңда оңтүстік өңірде күн сәулесінен сағатына 100 МВТ тоқ алатын үлкен инвестициялық жобаны қолға алып отырмыз. Ойымызда бір мешітке осындай күн электр стансасын орнату ниетіміз бар еді. Осы жұмысты бір-екі күнде аяқтаймыз», - дейді «DALA SOLAR» ЖШС директоры Ермек Қариев.

Мақаншы орталық мешітінің бас имамы Ұлан Нұрмұхаметұлы құлшылық үйіне көмек жасаған аталмыш компанияға алғыс білдірді.