ШҚО-дағы «Тарбағатай» ұлттық паркі саябақтар шеруін өткізді
Іс-шара барысында Абылай хан даңғылы бойымен орман шеберлері, спорт мектебінің ұжымы, ауданның белсенді жастары мен «Тарбағатай» мемлекеттік ұлттық табиғи паркінің жаңа автокөліктері шерумен жүріп өтті.
«Тәуелсіздік» алаңында өткен акцияның ашылуында сөз сөйлеген аудан әкімінің орынбасары Серікқазы Сәдуақасов экономика дамыған сайын қоршаған ортаны қорғау қиынға соғып бара жатқанын жеткізді. Оның айтуынша, осыдан бір жарым ғасырдан астам уақыт бұрын америкалық табиғат жанашырлары алдымен «Жер күні», «Ағаштар күні» деп аталған, дүниежүзі елдерінің дәстүріне енгізген табиғат байлықтарын қорғау шарасы елімізде 1996 жылдан бері атап өтіле бастаған.
«Бүгінде дүниежүзінде «Парктер шеруі» деген атауға ие болған шара халықтың назарын табиғаттың проблемаларына аудару, халықтың табиғат байлықтарын қорғап, экологиялық білімдерін жетілдіруге арналған. Аудан көлемінде «Парктер шеруі» акциясы жыл сайын өткізілуі дәстүрге айналған. Оған ауданымыздың барлық елді мекендерінен қатысып, акция барысында көшет отырғызу, сенбіліктер өткізу және тағы да басқа шаралар ұйымдастырылуда. Биылғы айтулы шара Nur Otan партиясы аудандық филиалының төрағасы С.Зайнулдиннің бастамасымен мектептер мен «Тарбағатай» мемлекеттік ұлттық паркінің және белсенді жастарымен бірге өткізілуде», - деді аудан әкімінің орынбасары Серікқазы Сәдуақасов.
«Тарбағатай» мемлекеттік ұлттық табиғи паркінің директоры Әлібек Тоқымтаев акцияның ашылуымен құттықтап, табиғатты қорғауға шақырды.
Табиғат қорғау акциясын қорытындылау барысында Мәдениет үйінің өнерпаздары табиғат тақырыбында ән шырқаса, парктің қыздары флеш-моб өткізіп, би биледі.
Айта кетейік, «Саябақтар шеруі» барысында мемлекеттік инспекторлар, орман шеберлері, мектеп оқушылары мен аудан жастары Науалы ауылына 300-ге жуық көшет отырғызды.