ШҚО-да Конституцияның 25 жылдығы қалай аталып өтілді

None
None
ӨСКЕМЕН. ҚазАқпарат – Шығыс Қазақстан облысында ҚР Конституциясы күніне орай бірқатар шаралар атқарылды, деп хабарлайды ҚазАқпарат тілшісі.

Егеменді Қазақстанның алғашқы Конституциясы 1993 жылы қабылданды. Конституция бас мемлекеттік органдарды жүйелендіруге бағытталған. 1995 жылы жалпы халықтық референдум өтті. Референдум барысында Қазақстан халқы жаңа Конституцияның жобасын мақұлдады. Оған 8 миллионның 89,14% дауыс берген еді. Құжатқа екі мәрте өзгертулер мен толықтырулар енгізілген. 2007 жылы Конституцияға жаңа форматтағы мемлекеттік құрылым – президенттік-парламенттік енгізілді.

25 жылдың ішінде Қазақстанның Ата Заңына сәйкес экономика, өндіріс, өнеркәсіп, ауыл шаруашылығы, медицина және білім саласы қарқынды дамыды. Конституция күніне орай Шығыс Қазақстандағы барлық қала мен ауданда мерекелік шаралар өтті.

Өңірде «Ата Заң аптасы» акциясы аясында облыстық прокуратура, нотариустер палатасы, кәсіпкерлер палатасы мен әділет департаменті құқықтық сауалдар бойынша онлайн-консультация ұйымдастырды.

Мәдениет саласында түрлі онлайн-әңгімелер, кітап көрмелері, тарих сағаттары мен «Конституция – болашақтың кепілі», «Қазақстанның Демократиялық Конституцияға дейінгі тарихи жолы», «Конституция тарихы – менің елімнің тарихы тақырыптары бойынша электронды викториналар өткізілді.

Бесқарағай ауданындағы 10 көпбалалы отбасы үшін Ата Заңның 25 жылдық мерейтойы естен кетпестей өтті. Бұл күні оларға жаңа пәтердің кілттері табысталды. Өңір жастары видео-челлендж ұйымдастырды.

С.Аманжолов атындағы Шығыс Қазақстан мемлекеттік университеті онлайн режимде дөңгелек үстел өткізді. «Қазақстан Республикасының Конституциясы: бірлік, тұрақтылық және өркендеу» атты дөңгелек үстелге ғалымдар, сарапшылар, сот өкілдері, прокуратура және басқа мемлекеттік органдардың қызметкерлері, сондай-ақ оқытушылар мен университеттің студенттері қатысты.

Өскеменде Конституция күніне орай «Жас техниктер стансасы» атты креативті білім беру орталығы ашылды. Сонымен қатар облыс орталығындағы белсенді қала тұрғындарына «Өскемен қаласының құрметті азаматы» атты төсбелгілер табысталды.

Шемонайха ауданының жастары Ворошилов және Ивановский жоталарына барып, Қазақстан Республикасының туын тікті. Коронавирус пандемиясына орай өңірде көптеген мерекелік шаралар онлайн режимде ұйымдастырылды.

Облыс тұрғындары 2D және 3D графикасының көмегімен, сондай-ақ анимация арқылы «Ел тірегі, ел бақыты – Ата Заң!» атты концертті тамашалады. Өскеменнің орталық көшелерінде мерекеге орай қала тұрғындары ту мен кітаптар таратты. Бұдан бөлек шаһарда 100 орындық балабақша қолданысқа берілді. Аталмыш нысанның құрылыс жұмыстары жеке инвестиция көздері есебінен салынды. Семей қаласында «Ата Заң – ел тірегі» атты онлайн конференция ұйымдастырылды.

Жалпы айтқанда, барлық қала мен ауданда шығармашылық ұжымдар мен этномәдени бірлестіктердің қатысуымен мерекелік онлайн-концерттер өткізілді.


Соңғы жаңалықтар