ШҚО-да кенттегі өрт сөндірілді, орманда жалынмен күрес жалғасып жатыр
ШҚО Төтенше жағдайлар департаменті баспасөз қызметінің мәліметіне сүйенсек, 11 мамырда таңғы сағат 7:00-де Лесхоз кентіндегі өртенген үйлер толық сөндірілді. Бірақ орманда тілсіз жаумен күрес әлі жалғасып жатыр. Тікұшақпен барлау барысында ашық жанып жатқан жалын байқалмаған.
«Жалпы өртті ауыздықтауға жеке құрамнан 500-ге жуық адам мен 69 техника жұмылдырылған. Оның ішінде департамент қызметкерлері, орманшылар, жергілікті атқарушы орган өкілдері және полицейлер бар. Өрт салдарынан бір адам көз жұмып, екеуі жарақат алған», - деп хабарлады ведомство өкілдері.
Естеріңізге сала кетсек, 10 мамыр күні ШҚО-дағы Риддер орман шаруашылығында өрт шықты. Дала өрті 310 гектар аумақты шарпып, 1 адам қаза тапты. Өртке байланысты шұғыл желі іске қосылды.
Мемлекет басшысы Үкімет пен Шығыс Қазақстан облысының әкімдігі өрттен зардап шеккен Лесхоз кентінің тұрғындарына көмек көрсетіп, баспанамен қамтамасыз етуді тапсырды.