Сенат баж сомасын бөлудің жаңа нормативтерін бекітетін ЕАЭО хаттамасын мақұлдады
Заң жобасы бұған дейін Парламент Мәжілісінде мақұлданған болатын.
«Хаттама 2019 жылы 1 қазанда Ереванда жасалды. Хаттамада кедендік әкелу баждарының сомаларын бөлудің жаңа нормативтерін бекіту көзделеді. Нормативтердің мөлшері мүше бес мемлекет үшін айқындалған. Бұл ретте Қазақстан үшін норматив 6,955% болып табылады. Аталған нормативтер Еуразиялық экономикалық одаққа мүше мемлекеттер арасында кедендік әкелу баждарын бөлуге мөлшерлес тәсілді қамтамасыз етуге арналған», - деді заң жобасын сенаторларға таныстырған Ұлттық экономика министрі Руслан Дәленов.
Сондай-ақ, Хаттамада мүше мемлекеттердің жоғары мемлекеттік қаржылық бақылау органдары бірлескен бақылау іс-шаралары шеңберінде мүше мемлекеттердің уәкілетті органдарының осы Хаттаманың ережелерін сақтауын жыл сайын тексеретіні айқындалған.
««Халықаралық шарттар туралы» заңға сәйкес осы Хаттама ратификациялауға жатады. Заң жобасын қабылдау әлеуметтік-экономикалық және құқықтық теріс салдарға әкеп соқтырмайды», - деді ол.
Заң жобасы біршама талқыланып, депутаттардың берген дауысынан кейін құжат қабылданды.