Семейде жыл басынан бері 24 бала менингит жұқтырған

Бұл жөнінде Семей қаласы жұқпалы аурулар ауруханасының директоры Сәуле Раушанқызының және мамандардың қатысуымен өткен баспасөз мәслихатында айтылды.

Серозды менингит - мидың серозды қабықтарын зақымдайтын энтеровирустық ауру. Барлық вирустар белгілі бір маусымда өршиді. Тұмау және герпесвирустар күзгі-қысқы кезеңдерде көп таралса, ал энтеровирустар үшін ішек вирусы сияқты жазғы кезең тән.

Энтеровирустық инфекция көп жағдайда су мен тамақ арқылы жұғады. Негізгі клиникалық белгілері: дене қызуының көтерілуі, бас ауруы, жүректің айнуы, лоқсу. Аталған белгілер пайда болған жағдайда өз бетінше емделуге жол бермей, бірден дәрігерге көріну керек дейді мамандар.

- Вирус табылған жағдайда адамға толық диагностика жасап, емдеу қажет. Бұл жұқпалы ауру тамыз айында қатты өршиді. Осыған байланысты негізгі мақсат – бұл инфекцияның халық арасында, атап айтқанда балалар арасында өсуіне және одан әрі таралуына жол бермеу керек. Және бұл мамандар бақылауында, - деді эпидемиологиялық қадағалау бөлімінің бас маманы Динара Бексұлтанқызы.

Жұқпалы ауруды жұқтырмау үшін қарапайым гигиена ережелерін сақтау керек. Жемістер мен көкөністерді мұқият жуу, қолды жуу, үй-жайды желдету. Су айдындарында және бассейндерде шомылғанда ауыз қуысына су жібермеу қажет.