Семейде волонтерлер 70-тен асқан қарттарға азық-түлік пен дәрі-дәрмек жеткізуде
Қала әкімдігі «Adal» супермаркет және «Adal-pharm» дәріхана желісімен бірлесіп, қарттар мен мүгедектерге ең қажет заттарды үйге жеткізуді ұйымдастырған. Ол үшін тұрғындар 52-12-12 телефон нөміріне қоңырау шалып, тапсырыс беруі тиіс. Жастар ресурстық орталығының еріктілері тамақ пен дәрілерді тиісті мекен-жайға дейін жеткізеді.
«Тапсырысты аптасына бір рет жасауға болады. Байланыс орталығының мамандары өтініштерді 07.00-ден бастап 19.00-ге дейін қабылдайды. Сәуірдің 2-сінен бері 1200 өтініш түскен», - деді ақпараттық технологиялар бөлімінің бас маманы Үміт Кеңесбекова.
Зейнеткер Бибігүл Алпанова 70 жаста. Қосымша шектеулер енгізілгеннен кейін зейнеткер үйден шығуын сиретті.
«Көрсетілген нөмірге қоңырау шалып, өзіме қажетті заттарға тапсырыс бердім. Еріктілер бәрін уақытында жеткізді. Менің ойымша, мұндай қиын уақытта біз үйде отыруымыз керек. Солай ғана біз өзімізді және жақындарымызды жұқпалы дерттен қорғай аламыз», - дейді Бибігүл Алпанова.
