10:52, 05 Маусым 2020 | GMT +6
Семейде рұқсат қағазын сатумен айналысқан әкімдік қызметкері жазаға тартылды
СЕМЕЙ. ҚазАқпарат – Семей қаласында карантин кезінде рұқсат қағазын сатып пайда тапқан әкімдік қызметкері сотталды, деп хабарлайды ҚазАқпарат тілшісі.
Сыбайлас жемқорлыққа қарсы іс-қимыл агенттігі ШҚО бойынша департаментінің мәліметіне сүйенсек, қалалық кәсіпкерлік бөлімінің бас маманы автокөлік жүргізушілеріне 5 қызыл рұқсат қағазын сатқан. Тергеу амалдары аяқталған соң оның ісі Семей қалалық №2 сотында қаралды.
«Бас маман төтенше жағдай кезінде 25 мың теңге пара алып, автокөлік иелеріне қала ішінде жүруге арналған рұқсат қағазын заңсыз берген. Сот үкімімен айыпталушыға 1 250 000 теңге мөлшерінде айыппұл салынды», - делінген хабарламада.