20:11, 12 Сәуір 2021 | GMT +6
Семейде көлік тұрғын үйге соғылды
СЕМЕЙ. ҚазАқпарат – Семей қаласында көлік жеке тұрғын үйге соғылды, деп хабарлайды ҚазАқпарат тілшісі.
ШҚО Полиция департаменті баспасөз қызметінің мәліметіне сүйенсек, жол-көлік оқиғасы Семейде 12 сәуір күні түнгі сағат 02.00-де болды. Анықталғандай, ер адам ішімдік ішіп алып, көлік тізгіндеген.
«39 жастағы шаһар тұрғыны рульді басқара алмай қалып, Чайковский көшесіндегі жеке тұрғын үйге соғылған. Оқиға орнына бірден полиция қызметкерлері аттанды. Зардап шеккен ешкім жоқ», - деп хабарлады ведомство өкілдері.
Көлік жүргізушісі ҚР ӘҚБтК-нің 608-бабы бойынша әкімшілік жауапкершілікке тартылды.