Семейде Абай атындағы жаңа мешіт ашылды

Мешіттің құрылысын 2008 жылы шетелдік инвесторлар бастаған болатын. Алайда қаржылық қиындықтарға байланысты олар жобаны жалғастырудан бас тартты.

Сол кездегі жобаның құны төрт миллион долларды құраған. 2010 жылы 100 миллион теңге бөлген «Қазақмыс» корпорациясы мешіт құрылысын жалғастыруды ұйғарды.

Бірақ корпорация да бұл істі соңына жеткізе алмаған.

Сегіз жыл бойы семейліктер мешіт құрылысына бей-жай қарамай, жұмыстың жандануына тілекші болды.

Мешіт жобасы осы уақытқа дейін бірнеше рет өзгерген.

2018 жылы құрылысты аяқтауға кәсіпкер Дулат Тастекеев кірісті. Өз қаражатымен жұмысты қайта жандандырған кәсіпкер басталған істі соңына дейін жеткізген.

Нәтижесінде бүгін қаладағы ең үлкен діни нысан бой көтеріп, салтанатты түрде ашылды.

«Жаңа төрт мұнаралы мешітке ұлы ақын Абай аты берілді. Сыйымдылығы - 2 500 адам. Алтын жалатылған мұнаралардың биіктігі 37 метрді құрайды. Түркістан әкімдігі Абайдың 175 жылдығына арналған іс-шаралар аясында оның аумағын абаттандырған. Олар бұл жобаға 600 миллион теңге бөлді. Мешіт ғимаратына іргелес 47 мың шаршы метр абаттандырылып, екі жерүсті көпір салынып жатыр. Сондай-ақ 500 автокөлікке арналған тұрақ қарастырылып, 200 шам орнатылған», - деп хабарлады Семей қалалық ақпарат орталығы.

Ашылу салтанатына ҚР Бас мүфтиі Наурызбай қажы Тағанұлы, дін өкілдері мен қала басшылығы қатысты.

Қала әкімі Нұрымбет Сақтағанов құрылысқа атсалысқан барлық жанға алғыс айтып, семейліктерді көптен күткен мешіттің ашылуымен құттықтады.

Шаһар тұрғындарын құттықтауға атақты ақын Мұхтар Шаханов пен театр және кино режиссері Асанәлі Әшімов те келді.

«Бүгінгі шара Наурыз мейрамымен тұспа-тұс келіп отыр. Семейліктер үшін бұл үлкен қуаныш. Мешіт құрылысы ұзаққа созылып, біраз уақытқа тоқтатылды. Дулат Тастекеевтің арқасында құрылыс қайта жанданып, бүгін оның ашылуын атап өтудеміз. Баршаңызды Ұлыстың ұлы күнімен құттықтаймын», - деді ҚР Бас мүфтиі Наурызбай қажы Тағанұлы.

Дулат Тастекеевтің айтуынша, құрылысты өткен жылдың тамыз айында Абайдың 175 жылдығына орай аяқтау жоспарланған еді.

Бірақ коронавирус пандемиясына байланысты жұмыс кешеуілдеген.

«Мешіт құрылысы екі жарым жыл жүргізілді. Біз құрылысты алғаш бастаған кезде оны екі жыл ішінде аяқтап, 2020 жылдың тамызында, хакім мерейтойына орай ашуды жоспарладық. Алайда, әлемдік пандемия жұмысқа әсер етпей қоймады. Сондықтан құрылыс тағы жарты жылға созылды. Соған қарамастан, біз басталған істі соңына дейін жеткізе алдық. Күн мен түн теңелген қасиетті күні сіздермен бірлесіп мешітті салтанатты түрде ашып жатырмыз. Бұл мен үшін және бүкіл Семей үшін үлкен қуаныш. Өйткені семейліктер бұл мешіттің ашылуын он жылдан астам уақыт күтті. Осы жылдар ішінде талай мердігер өзгерді. Ал бізді мешіттің тағдыры алаңдатпай қоймады. Семейдің дамуына өз үлесімізді қосқанымызға өте қуаныштымыз», - дейді Дулат Тастекеев.