Сарыағашта депутаттар «Ауыл – ел бесігі» жобасының маңызын түсіндірді

None
None
ТҮРКІСТАН ОБЛЫСЫ. ҚазАқпарат –Сарыағаш ауданына ҚР Парламенті Мәжілісінің депутаттары іс-сапармен келді, деп хабарлайды ҚазАқпарат тілшісі.

ҚР Парламенті Мәжілісінің депутаттары Құдайберген Ержан, Уәлихан Қайназаров және Мұхтар Ерман жергілікті халықпен кездесу барысында ұстаздардың мәртебесін көтеру, көпбалалы отбасыларға жаңа форматта тұрақты жәрдемақы беру, аз қамтылған отбасыларға атаулы әлеуметтік көмек беру ережелері жақсара түскенін атап өтті.

ҚР Президенті Қасым-Жомарт Тоқаевтың сайлауалды бағдарламасындағы міндеттер нақты жүзеге аса бастағанын мәлімдеді. 2020 жылдың 1 қаңтарынан бастап міндетті медициналық сақтандыруды енгізу жұмысы басталғанын және партияның «Ауыл – ел бесігі» жобасының маңыздылығын да атап өтті. Депутаттар сондай-ақ, Жібек жолы ауылындағы «Агротур» шаруа қожалығында да болды. Екі жыл бұрын құрылған шаруа қожалығында түркиялық технология қолданылады. Мұнда түрлі көкөністердің көшеттері өсіріліп, дән себу жұмысы автоматтандырылған.

Шаруа қожалығының басшысы Тұрсын Тасходжаевтың айтуынша, өңірдегі жылыжайлар осында көкөніске алдын-ала тапсырыс береді. Шаруа қожалығының жұмысын жоғары бағалаған депутаттар Түркістан облысында ауыл шаруашылығын дамытуға мүмкіндік мол екенін айтты. Осында кәсіпкерлермен жүздескен заң шығарушы орган өкілдері жуырда қолданысқа енгізілген заңдар еліміздің дамуына оң серпін беретінін жеткізді.

Жұмыс орындарын ашу, кәсіпкерлікті дамыту, ауыл шаруашылығын жандандыру, қолданысқа енгізілген жаңа заң баптары Сарыағаш ауданы, Дарбаза ауылындағы «Фирма Сакен» ЖШС аумағындағы кездесуде де сөз болды. Осында ауыл тұрғындарымен жүздескен депутаттар Байділдә Жылқышиев, Сәкен Қаныбеков және Мансұрхан Махамбетов мемлекет тарапынан қолға алынған бастамалар жөнінде пікір алмасты. Кәсіпкерлікті, ауыл шаруашылығын жандандыруға бағытталған жеңілдіктер мен субсидиялар жайы да әңгіме арқауына айналды. Депутаттар Сарыағаш қаласындағы 5 қабатты 13 тұрғын үйдің құрылыс барысымен танысты. «Нұрлы жер» бағдарламасы аясында құрылысы 2018 жылы басталған үйлер биыл пайдалануға беріледі.

Сонымен бірге, депутаттар «Жібек жолы» кеден бекетінің жұмысымен танысты. Осылайша, ҚР Парламенті Мәжілісіндегі «Nur Otan» партиясы фракциясының мүшелері Түркістан облысы аумағын түгел аралап, жаңа заң баптарын түсіндірумен қатар өңірдегі өзекті проблемалармен танысты. Осы іссапарлар барысында анықталған мәселелер ҚР Парламентінде талқыланады деген жоспар бар.




Соңғы жаңалықтар