Республикадағы өрттердің басым бөлігі ТЖМ бөлімшелері жоқ шалғай аумақтарда болады

«Елді мекен аумақтарында құрғақ шөптердің өртенуі алаңдатады, өйткені оның жалыны тұрғындардың аумағына өтіп кету қаупі бар. 2021 жылғы 26 сәуір мен 3 мамыр аралығында құрғақ шөптің өртенуі тұрғын үйлерге, жазғы сауықтыру лагерлерінің ғимараттарына, саяжай және шаруашылық құрылыстарына таралуының 4 жағдайы тіркелді», - дейді Өртке қарсы қызмет комитетінің төрағасы Нұрболат Дербісов.

Оның айтуынша, биыл 1-2 мамырда Павлодар қаласында бау-бақша және саяжай аумақтарында құрғақ шөптің жануының 2 оқиғасы тіркелді.

«Нәтижесінде 5 саяжай толығымен жойылып, 7 саяжай жартылай зақымдалды. Биылғы жылғы 2 мамырда Солтүстік Қазақстан облысының Желяково ауылында құрғақ шөп өртеніп, кейін жалын жеке тұрғын үй секторындағы 6 үйге таралды, сол күні Қызылжар ауданындағы «Сосновый бор» балалар сауықтыру лагерінің аумағында құрғақ шөп өртеніп, кейіннен жалын демалушылар тұратын корпусқа өтті. 2 мамырда Нұр-Сұлтан қаласындағы Сарыарқа ауданында құрғақ шөп өртеніп, жалын тұрғын үйге таралған, сондай-ақ өрттің салдарынан жеңіл автокөлік жанып кетті», - дейді ол.

Айта кету керек, орман және дала өрттерінің көп бөлігі 100 км-ден астам радиуста, ТЖМ бөлімшелері жоқ шалғай аумақтарда орын алады.