Президент тапсырмасы: Құқық қорғау қызметіне қатысты ілкі жоба таныстырылды
Бұл туралы ҚазАқпарат ҚР Бас прокуратурасының ресми сайтына сілтеме жасап хабарлайды.
Шараға Қазақстан Республикасы Президенті Әкімшілігінің басшысы Ерлан Қошанов, Президенттің көмекшісі – Қауіпсіздік Кеңесінің Хатшысы Әсет Исекешев және құқық қорғау органдарының басшылары, сондай-ақ құқық қорғау жүйесін реформалау жөніндегі жұмыс тобының мүшелері қатысты.
Полиция тергеушісі мен прокурор ілкі жобаның тәжірибеде қолданылуын көрсетті.
Ілкі жоба адам құқықтары мен бостандықтарына қатысты сотқа дейінгі тергеп-тексеру органдарының негізгі шешімдерін келісу бойынша прокурордың өзіне жүктелген міндеттерін орындаудың электрондық форматын көздейді.
Осыған дейін екі өңірде - Павлодар және Шығыс Қазақстан облыстарында ілкі жоба сынақтан өтті. 1 қазаннан бастап жоба республиканың барлық аймағында іске қосылды.
Жобаның мәні тергеушінің іс-әрекетті саралау, қайта саралау, сондай-ақ тергеуді тоқтату туралы шешімін сотқа дейінгі тергеп-тексерудің бірыңғай тізілімінде электрондық түрде қалыптастыруда болып табылады.
Прокурор онлайн режимінде олардың заңдылығын белгіленген мерзімде тексеруге, заңбұзушылықтар анықталған жағдайда ден қою шараларын қабылдауға міндетті.
Мұндай модель іс жүргізу құжаттарын дайындау уақытын және тергеу мерзімдерін қысқартады.
Бұдан басқа, қылмыстық процеске қатысушыларға қабылданған процестік шешімдерді қашықтан қадағалауға, келіспеген жағдайларда оларға уақтылы шағым жасауға мүмкіндік беріледі.
Бас Прокурор бұл жаңалықтар алдын ала прокурорлық қадағалауды қамтамасыз етуге және адал азаматтардың қылмыстық қудалау шеңберіне тартылуын болдырмауға бағытталғанын атап өтті.
Кездесу қорытындысы бойынша Ерлан Қошанов атқарылып жатқан жұмыстардың маңыздылығын атап өтіп, ағымдағы жылдың соңына дейін Жобаны сынақтан өткізуді аяқтауды, нормативтік-құқықтық базаны дайындауды және 2021 жылғы 1 қаңтардан бастап Мемлекет басшысының Қазақстан халқына Жолдауында көрсетілген тапсырмаларын іске асыруға кірісуді тапсырды.