Президент сайлауы заңнама талаптарына сай өткізілді - Серік Ақылбай
«Заңгерлер одағының негізгі міндеті - сайлауға қатысатын сайлаушыларды құқықтық тұрғыда ағарту. ҚР Президентінің кезектен тыс сайлауын өткізу туралы жарияланған сәттен бастап «Заңгерлер әділ сайлау үшін» республикалық қоғамдық бірлестігі сайлау процесінің әрбір кезеңі бойынша баспасөз мәслихаттарын өткізді. Заңгерлер сайлау жарияланғаннан бастап кандидаттарды ұсыну және тіркеу сәтінен, сайлау алдындағы үгіт жүргізуден тыныштық күніне дейін барлық кезеңде құқықтық түсініктеме беріп отырды», - деді Серік Ақылбай.
Қазақстан заңгерлер одағының төрағасы заңгерлер сайлаудың барлық кезеңіне құқықтық баға бергенін тілге тиек етті.
«Осы кезеңде заңгерлер одағы біздің сайлаушыларды алаңдатқан сұрақтар бойынша бес ақпараттық бюллетень шығарды. Заңгерлер одағы мен оның өңірлік өкілдіктері таңертеңнен бастап сайлау учаскелерінде жұмыс жүргізіп, азаматтарға кеңес беріп, олардың құқықтарын түсіндіріп берді. Заңгерлеріміздің бәрі республиканың түкпір-түкпірінен белсенді жұмыс істеді. 17 өңірден 3 мың заңгер сайлау учаскелерінде еңбек етті. Біздің өңірлердегі өкілдіктердің мәліметі бойынша, жалпы, президент сайлауы сайлау заңнамасының талаптарына сай өткізілді», - деді Серік Ақылбай.
Еске сала кетейік, кеше жаңадан сайланған Қасым-Жомарт Тоқаев Қазақстан Республикасының Президентін ұлықтау рәсімінде халқына адал болуға ант берген болатын.