21:10, 25 Қазан 2020 | GMT +6
«Пластикке толы планета»: Алматыда атақты фотографтың көрмесі өтіп жатыр
АЛМАТЫ. ҚазАқпарат – Алматыда «Telli Gallery» залында британ фотографы Мэнди Баркердің «Пластикке толы планета» эко-көрмесі өтіп жатыр, деп хабарлайды ҚазАқпарат тілшісі.
Мэнди Баркер – көптеген марапатқа ие болған халықаралық фотограф.
Оның теңіз түбіндегі пластик тақырыбына түсірген суреттері соңғы 10 жылда әлемдік өнерсүйер қауым тарапынан жоғары баға алып келеді.
«Telli Gallery» залындағы көрме де жаһандық тақырып – экологияның ластануын көтереді.
Көрмеде картиналардан бөлек әлемнің картасы орнатылған. Онда балаларға қоқысты дұрыс сұрыптау туралы ойын түрінде ақпарат берілген.
Мэнди Баркер әлемнің 40 елінде: БҰҰ штаб пәтерінен бастап Моңғолияға дейін көрме ұйымдастырған.
Баркер «Prix Pictet Award SPACE 2017» сыйлығының шорт парағына енген, «Deutsche Borse Foundation Photography Prize 2020» қоры сыйлығының лауреаты.
Көрме жыл соңына дейін 10:00-20:00 аралығында ашық болады. Кіру тегін.