Петропавлда тұрғын үйде болған өрттен 4 адам құтқарылды
Солтүстік Қазақстан облысы төтенше жағдайлар департаменті баспасөз қызметінің мәліметінше, бүгін сағат 01.16 минут кеткенде 101 нөміріне Петропавлдағы Ружейников көшесі, 97 мекенжайында өрт шыққандығы жөнінде хабар түседі. Үш қабатты, екі кіреберісті, шлак блоктан салынған тұрғын үйдің екінші кіреберісінде қою түтін шыққан. Сондай-ақ бірінші қабаттағы қосалқы үй-жайдың кіреберіс есігі жанып, тұрғындар өздігінен далаға шыға алмай қалған.
Оқиға орнына кезекші қарауыл 8 минутта жетті. Бірден эвакуациялық іс-шаралар басталып, газтүтіннен қорғау қызметі мамандары 16 адамды, соның ішінде 4 баланы қауіпсіз жерге шығарды.
Тағы төрт адам құтқару капюшондарының көмегімен өрт орнынан шығарылды. Құтқарылғандардың бірі - 2005 жылы туған бала. Иіс тиіп уланған баланы құтқарушылар үйден көтеріп шығарды.
Мамандардың айтуынша, өрт шамамен сағат 2.00-де толық сөндірілді. Өрт салдарынан 3 шаршы метр аумақта қабырға мен есік бүлінген.
Қаза болғандар жоқ. Иіс тиген бала ауруханаға жатқызылды. Өрттің шығуына отты абайсыз қолдану себеп болуы мүмкін.