Педагогтарды беделді, танымал тұлғаларға айналдыру керек – Мемлекет басшысы
«Педагогтардың мәртебесіне қолдау көрсету қажет. Оларды қоғамдағы беделді, танымал тұлғаларға айналдыру керек», - деді Мемлекет басшысы Ұлттық қоғамдық сенім кеңесінің онлайн форматтағы 3-отырысында.
«Менің тапсырмаммен алдағы төрт жылда мұғалімдерге төленетін жалақыны екі есе арттыру қарастырылған. Одан бөлек, білім сапасын қамтамасыз ету өте маңызды. Педагогикалық білім беруді жаңғырту оқу жоспарларының 100% жаңартылуын, IT-құзіреттер, оқытудың заманауи әдістері мен технологиялары бойынша арнайы модуль енгізуді қамтамасыз етуі керек», - деді Қасым-Жомарт Тоқаев.
Сонымен бірге, Президент педагогикалық мамандықтарға түсу талабы кезең-кезеңімен күшейетінін, болашақ педагогтардың шәкіртақысы 26 мың теңгеден 42 мың теңгеге дейін өсетінін айтты.