Павлодар облысында полицейлер 5 мың бас малды айыппұл тұрағына қамады
Бақылаусыз жайылып жүрген мал мәселесі бүгінгі таңда өзекті болып отыр. Иесіз мал-ұрылар үшін оңай олжа, сонымен қатар қайғылы салдары бар жол-көлік оқиғаларына әкелуі мүмкін.
Мысалы, Тереңкөл ауданындағы «Омбы – Майқапшағай» автожолының 324 шақырымында патрульдік полиция қызметкерлері қараусыз жайылып жүрген сиырларды анықтады. Полицейлер 10 сиыр арнайы айып тұрағына қамады. Полиция қызметкерлері мал иесін анықтады. 40 жастағы ауыл тұрғыны ҚР ӘҚБК 408-бабы бойынша әкімшілік жауапкершілікке тартылып, 3 АЕК мөлшерінде айыппұл салынды.
Сондай-ақ, «Ленин – Ақсу» автожолының 11 шақырымында сиырлар жүрген. Ірі қара мал трассада және қыста мал азығына арналған шөпті таптап, шабындықта бақылаусыз жайылып жүрген. Учаскелік полиция инспекторы 34 бас малды айыппұл тұрағына қамады. 55 жастағы мал иесі ҚР ӘҚБК 408-бабы бойынша әкімшілік жауапкершілікке тартылды.
«Жыл басынан бері павлодарлық полицейлер бақылаусыз жайылып жүрген 4 936 малды анықтады, олар айыппұл тұрағына қамалды. Бүгінгі күні облыс аумағында малға арналған 146 айыппұл тұрақтары жұмыс істейді», - деді Павлодар облыстық полиция департаментінің патрульдік полиция ротасы командирінің міндетін атқарушы Әділет Мерғазин.