Павлодар облысында дала өрті өршіп тұр

2017 жылдың басынан бері Павлодар облысының мемлекеттік орман қоры аумағында 65 өрт оқиғасы тіркелді. Жалын шарпыған аумақ - 1034 гектар, оның 56 гектары орманды жерлер. Келген шығын көлемі - 2 млн 405 мың теңге. Бұл жайында брифингте Павлодар облыстық ТЖ департаментінің басшысы Әлібек Длимов мәлімдеді.

Оның айтуынша, 2016 жылдың осы кезеңіндегі көрсеткішпен салыстырғанда, жану фактілері алты оқиғаға артқан, ал өрт шалған орман аумағы тоғыз есеге ұлғайды, материалдық шығын шамамен үш есеге, яғни 27 пайызға артты.

Орман өрттерінің шығуының негізгі себебі найзағайдың түсуі болып отыр.

Тілсіз жауды ауыздықтауға Павлодар облысының ауылдық жерлерінде құрылған 2 523 адамнан тұратын әрі тиісті құрылғылармен жабдықталған 216 ерікті жасақтар мен мемлекеттік өртке қарсы қызметтері жоқ шалғай елді мекендерде жұмыс істейтін 21  өрт бекеті көмектеседі.

Ә.Длимовтың айтуынша, ерікті жасақтар мемлекеттік өртке қарсы қызмет көмегінсіз дала өртінің 75 пайызын өз беттерімен ауыздықтады, ал өрт бекеттері 49 шақыртуға шықты.