16:25, 16 Қыркүйек 2021 | GMT +6
Патогендермен жұмыс істейтін мамандардың айлығын 50 пайызға көтеру ұсынылды
НҰР-СҰЛТАН. ҚазАқпарат –ҚР Денсаулық сақтау вице-министрі – Бас санитар дәрігер Ерлан Қиясов патогендермен жұмыс істейтін мамандардың айлығын 50%-ға көтеруді ұсынды. Бұл туралы ол «Қазақстан Республикасының биологиялық қауіпсіздігі туралы» заң жобасын Мәжіліс депутаттарына таныстыру кезінде айтты, деп хабарлайды ҚазАқпарат тілшісі.
Ерлан Қиясовтың сөзінше, Заң жобасында 2022-2024 жылдар аралығында жалпы сомасы 25 млрд теңгеден асатын шығыстар көзделген. Соның ішінде негізгі үш бейінді ведомство – Денсаулық сақтау министрлігіне – 23,4 млрд теңге, Ауыл шаруашылығы министрлігіне – 1,1 млрд теңге, Білім және ғылым министрлігіне – 1,1 млрд теңге қарастырылған.
«Бұл қаражаттың ішінде 10,9 млрд теңге қауіпті патогендермен жұмыс істейтін мамандардың айлығын 50%-ға көтеру, үстемеақы төлеу, 2 лауазымдық еңбекақы мөлшерінде сауықтыруға арналған жәрдемақы беру, биоқауіпсіздік саласындағы мамандардың біліктілігін арттыру және қайта даярлау мәселелеріне бағытталады», - деді Бас санитар дәрігер.