Пандемия кезінде қазақстандықтар әр 5 теңгенің екі теңгесін азық-түлікке жұмсаған

«Бөлшек сауданың 60 пайызы сауда кәсіпорындары мен ұйымдарына тиесілі. Дәстүрлі ритейлдің ауқымды көлемі Алматы (3,4 трлн теңге, шынайы көрсеткіште 7,9 пайызға төмендеген) және Нұр-Сұлтан (1,3 трлн теңге, шынайы көрсеткіште 8,9 пайызға төмендеген) қалаларының еншісінде. 1 триллион теңгелік шектен Шығыс Қазақстан мен Қарағанды облыстары да асып түсті. Қалған өңірлерде бөлшек сауданың көлемі 170,5 млрд теңгеден 708,3 млрд теңгеге дейін болды» делінген зерттеуде.

Бөлшек сауда құрылымында азық-түлікке жатпайтын тауарлар әлі де басымдыққа ие: 7,1 трлн теңге (әйтсе де бұл көрсеткіш 2019 жылғы көрсеткіштің ұқсас кезеңімен салыстырғанда 5,1 пайыз төмен).

Ал азық-түлік саудасы былтыр алдыңғы жылға қарағанда 17,9 пайыздық өсімді көрсетіп, 4,4 трлн теңгеге жетті.

Жалпы ритейлде азық-түлік саудасының үлесі 38,3 пайызға (оның алдында 33,4 пайыз болатын) жетті.

«Карантин енгізілген айларда сауда нысандарының бірқатары жабылып қалғаны белгілі. Ал азық-түлік сататын дүкендердің жұмысы тоқтаған жоқ. Бұл жағдай жалпы ритейлде азық-түлік үлесінің артқанын көрсетті. Мысалы жалпы ритейлде азық-түліктің үлесі былтыр наурызда 37,3 пайызды көрсетсе, сәуірде 51,5 пайызға жетті. Ал мамыр-маусым айларында 39,9, шілдеде 41,4 пайыздық деңгейде болды» делінген Finprom.kz мәліметінде.