+7 (701) 759 90 19
USD 423.87 EUR 505.25
RUB 5.59 CNY 64.43
Jańalyqtar

Отбасында зорлық көрген елордалық 320 әйел көмекке жүгінген

2020 жылғы 21 қазан 16:25
Бөлісіңіз:
Отбасында зорлық көрген елордалық 320 әйел көмекке жүгінген

НҰР-СҰЛТАН. ҚазАқпарат – Биылғы тоғыз айда елордада 320-дан астам әйел зорлық-зомбылықтан қорғау тобының инспекторларына көмекке жүгінген. Бұл туралы Әйелдерді зорлық-зомбылықтан қорғау тобының аға инспекторы Гүлмира Шырахметова бүгін баспасөз конференцияда айтты, деп хабарлайды ҚазАқпарат тілшісі.

«2020 жылдың тоғыз айында 320-дан астам әйел біздің көмегімізге жүгінді. 160-қа жуық әйел Әйелдерді зорлық-зомбылықтан қорғау тобының жеке қабылдауында болды. Бала-шағалы 39 әйел Дағдарыс орталығына орналастырылды. Олардың өтініштері бойынша 93 құқық бұзушы әкімшілік жауапкершілікке тартылып, 127 қорғау нұсқамасы шығарылды. 47 әйелге азаматтық-құқықтық қатынастарда көмек көрсетіліп, 89 адам мәжбүрлеп емдеу мекемелеріне орналастырылды. Олардың кейбіреуі балаларымен бірге Дағдарыс орталықтарына орналастырылды. Ал кейбіреуіне үкіметтік емес ұйымдардың өкілдерімен бірге көмек көрсетілді», - дейді Гүлмира Шырахметова.

Инспекторлар тұрмыстық зорлық-зомбылық құрбаны болған әйелдерге мәселелерін шешуге, жұмыс табуға, кейде құжаттарын қалпына келтіруге көмектеседі.

«Адам құқығы және заңдылықты сақтау жөніндегі Қазақстандық бюро Украинадан Кеңес Одағы кезеңінде келген әйелдің құжаттарын қалпына келтірді. Бұған дейін оның ешбір құжаты болмаған. Тиісінше, әйелдің балаларында да ешбір құжат болмаған. Құжаттарды қалпына келтіргеннен кейін ол балаларына әлеуметтік төлемдер ала бастады және жұмысқа орналасып, баспаналы болды. Мұндай мысалдарды көптеп келтіруге болады», - дейді аға инспектор.

Оның айтуынша, әйелдер инспекторларға әртүрлі мәселемен жүгінеді.

«Біз үйлестіруші орган ретінде үкіметтік емес ұйымдарға хабарласып, оларға көмектесеміз. Көптеген әйел күйеулерімен де жұмыс жасағанымызды қалайды. Азаматтық бастамаларды қолдау орталығы бар. Олар қазір 12 отбасымен жұмыс істеуде. Бұл отбасыларға қиындықтарды жеңуге және отбасыдағы қарым-қатынасты реттеуге көмектеседі», - дейді Гүлмира Шырахметова.

Инспектордың сөзінше, отбасылық дау-дамайда ерлі-зайыптының біреуі ғана кінәлі болуы мүмкін емес.

«Біз отбасыны барынша сақтап қалуға тырысамыз. Ал отбасын сақтап қалу мүмкін емес жағдай болса – онда әңгіме басқаша, әрине. Тұрмыстық зорлық-зомбылық көп жағдайда ішімдік ішкен күйде болады және қол көтеруге де көп жағдайда қызғаныш себеп болады», - дейді ол.

Еске салайық, елімізде тұрмыстық зорлық-зомбылық құрбаны болған әйелдер үшін 1409, ал жыныстық зорлық-зомбылық құрбандары үшін +7081060810 және 150 нөмірі бойынша байланыс орталықтары жұмыс істейді. Бұл сенім телефондары арқылы құқықтық және психологиялық кеңес алуға болады.

Біздің каналымызға жазылыңыз:

Бөлісіңіз:

Автор:

Зарина Қаһарман

Пікір қалдыру
+7
Жіберу
ONLAIN QYZMETKERLER
REDAKTOR
Жанибек Амангелди
Жанибек Амангелди
954-059
REDAKTOR
Жанат Қапалбаева
Жанат Қапалбаева
954-059

MURAǴAT