18:34, 25 Ақпан 2020 | GMT +6
Өскеменде трамвай өртенді
ӨСКЕМЕН. ҚазАқпарат – Бүгін Өскемен қаласындағы Қазақстан көшесінде келе жатқан трамвайдан өрт шықты, деп хабарлайды ҚазАқпарат.
«Өскемен көлік компаниясы» ЖШС директоры Михаил Чайка болған оқиғаның мән-жайын айтып берді.
«Күннің күрт жылынып кетуіне байланысты трамвай рельсіндегі қар еріген. Жолай өтіп бара жатқан көліктер су шашып, қоғамдық көліктің моторы ылғалданған. Бұл өрттің шығуына себеп болған», - дейді ол.
Оның айтуынша, трамвай бірден қалалық паркке жеткізіліп, тексерілуде.
Естеріңізге сала кетсек, осыған дейін Өскеменде трамвайдың рельстен шығып кеткені хабарланған болатын.