Өскеменде 11 шілдеге дейін карантин шаралары күшейтілді
Бұл туралы қаланың бас мемлекеттік санитар дәрігерінің 25 маусымдағы қаулысында жазылған. Құжаттағы деректерге сәйкес, соңғы тәулікте вирус жұқтырғандар саны 25,4%-ға, ал апта көлемінде 16,6%-ға артты.
Осыған байланысты тұрғындар жеке көлігімен жұмыс күндерінде мемлекеттік нөмірдің соңғы санының «жұп» және «тақ» болуына байланысты жүреді.
Сондай-ақ жеке көлік құралдарымен түнгі сағат 22:00-ден 05:00-ге дейін, бұдан бөлек мереке және демалыс күндері жолға шығуға тыйым салынған. Тұрғындардың қозғалысы да тек рұқсаттама арқылы жүзеге асады.
Шаһарда спорт, концерт және адам көп шоғырланатын басқа да іс-шараларды өткізуге әлі де рұқсат берілмейді. Сауда нысандарының жұмыс уақыты шектеледі. Мысалы, азық-түлік саудалайтын дүкендер сағат 08:00-ден 20:00-ге дейін, ал моншалар мен сауналар 15:00-ден 20:00-ге дейін жұмыс істейді.
Алайда азаматтарға демалыс күндері жеке көлігмен «жұп» және «тақ» қағидаты бойынша саяжай мен бау-бақша учаскелеріне баруға рұқсат етілді.
Сонымен қатар қоғамдық көлік жұмыс күндері 50%-ға қысқартылса, демалыс пен мереке күндерінде мүлде жүрмейді.