Оңтүстік Кореяда көлігімен бала қаққан қазақстандыққа қатысты екінші сот отырысы келесі айда өтеді
«Алғашқы сот отырысы өтті. Сот отырысында Қазақстан азаматының анасы да қатысты. БАҚ-та жарияланғандай, ол сотта кешірім сұрады. Келесі сот отырысы шамамен желтоқсан айының ортасында өтеді», - деді Айбек Смадияров СІМ-де өткен баспасөз мәслихатында.
ҚР СІМ ресми өкілі қазақстандық жас жігітке нақты қандай жаза кесілетінін сот шешетінін атап өтті.
«Әзірге тек тараптар тыңдалды», - деді ол.
Еске сала кетсек, 16 қазан күні қазақстандық азамат Оңтүстік Кореяда кішкентай баланы көлігімен қағып, сол елден қашып кеткен. Ол бұл мемлекетте бір жылдам астам уақыт бойы заңсыз тұрып келгені анықталды. Кейін ол өз еркімен Сеул қаласына қайтып оралды.
Бүгінгі таңда ол Чанвон қаласындағы тергеу изоляторында жатыр.
Сондай-ақ, Оңтүстік Кореяда көлігімен бала қаққан қазақстандыққа бірнеше айып тағылған болатын.