12:37, 16 Қазан 2019 | GMT +6
Оңтүстік Кореяда бала қағып кеткен қазақстандықтың әпкесі де сол елде заңсыз жүрген
НҰР-СҰЛТАН. ҚазАқпарат – Оңтүстік Кореяда бала қағып кеткен қазақстандықтың әпкесі де сол елде заңсыз жүрген. Бұл туралы ҚР Сыртқы істер министрлігінің ресми өкілі Айбек Смадияров айтты, деп хабарлайды ҚазАқпарат тілшісі.
«Оның әпкесі де Кореяда заңсыз жүріп жұмыс істеген. Бірақ, оның аталған оқиғаға, жол-көлік апатына еш қатысы жоқ. Мән-жайды анықтау жас жігіттің төңірегінде жүргізілуде. Әпкесінің оқиғаға қатысы жоқ. Ол қазіргі уақытта Қазақстан аумағына оралды және үйіне кетіп барады», - деді Айбек Смадияров.
Еске сала кетейік, біраз уақыт бұрын Қазақстан азаматы Оңтүстік Кореяда кішкентай баланы қағып, оқиға орнынан ізін суытқан еді.
Кейін оның Павлодарда жүргені белгілі болды.
14 қазанда Қазақстан азаматы тергеу іс-шараларына қатысу үшін Сеул қаласына өз еркімен ұшып барды.
Бүгін Қазақстанның Оңтүстік Кореядағы консулы тергеушімен және қазақстандықпен кездеседі.