Нығматулин: жаңа Кодекс - еліміздің экологиялық жағдайын жақсартуға арналған нақты қадам

None
None
НҰР-СҰЛТАН. ҚазАқпарат - Бүгін Мәжіліс спикері Нұрлан Нығматулиннің төрағалымен жалпы отырыс өтті. Онда депутаттар Экологиялық Кодекстің жобасын бірінші оқылымда мақұлдады, деп хабарлайды ҚазАқпарат төменгі палатаның баспасөз қызметіне сілтеме жасап.

Ол қоршаған ортаны қорғау саласында мемлекеттік реттеу мен басқарудың неғұрлым тиімді және айқын жүйесін құруға бағытталған.

Кодекс жобасы бойынша баяндама жасаған Экология, геология және табиғи ресурстар министрі Мағзұм Мырзағалиевке депутаттар бірқатар сұрақтар қойып, пікірлерін білдірді.

Осы ретте, Мәжіліс төрағасы аталған Кодекс жобасындағы кейбір олқылықтарды ашып көрсетті. «Мәселен, Қарағанды облысының Ұлытау ауданы тұрғынының 5-10 тауығы бар делік. Оны декларациялау үшін ол облыстық табиғи ресурстар басқармасына баруы керек. Ал ол облыс орталығында орналасқан. Яғни, ол тіпті 5 емес, тіпті 1 тауығын декларациялау үшін 700 шақырымды жүруі керек. Кодексте осылай жазылған. Неліктен олай? Сіз Кодексте «100 және одан төмен бас үшін» деп жазасыз. Оған, яғни, мал болсын, құс болсын кіреді. Ол санға 99 малды да, 1 малды да кіргізуге болады. Әлбетте бір табынның бір тауыққа қарағанда экологияға тигізетін әсері мол екенін алдымен түсініп алу керек. Заң жобасының осындай нормасын оқыған кезде ойлайсың, бұл норманы жазған адам ауылда болды ма, болмаған шығар? Шіркін, осы норманы жазған маманды екі-үш айға ауылға жіберсе ғой. Сонда тауық пен сиырдың айырмашылығын түсінетін болар, - деді Нұрлан Нығматулин.

Осы мәселе бойынша жалпы отырыс барысында оған ілеспе заң жобасы да талқыланды. Депутат Тарас Хитуов Ұлттық экономика министрлігіне экологиялық төлемдердің еліміз өңірлерінің жергілікті экологиялық қажеттіліктеріне жүз пайыз бағытталуы туралы нормалар бар екенін айтып, сұрағын қойды. Сонымен қатар, бұл қаражаттың жұмсалу тәртібі мен нысаналы мақсаты көзделмегенін жеткізді.

Сондықтан депутаттар экологиялық төлемдердің жергілікті бюджетке түсіп, қоршаған ортаны қорғау жөніндегі іс-шараларға ғана бағытталуы үшін түзетулер ұсынды.

Осы ретте, Нұрлан Нығматулин бұл норманың өте маңызды екенін алға тарта келіп, «көп болса да, аз болса да, экологиялық төлемдер жергілікті бюджетке түседі. Одан кейін - ол ақша қайда, қандай мақсатқа жұмсалады, оны бір Құдай біледі. Жасыратыны жоқ, сол ақша экологиядан басқа да шараларға жұмсалатын жағдайлар болады. Енді осы Заң жобасына сәйкес, экологиялық төлемдер тек ғана қоршаған ортаны қорғау шараларына жұмсалатын болады. Түскен ақшаның 100 пайызы. Бұл өте дұрыс, өте қажетті деп ойлаймын. Сондықтан, бұл норманы қолдау керек, - деп атап өтті.

Осыған сәйкес, Нұрлан Нығматулиннің айтуынша, жалпы Экологиялық Кодекс Мәжіліс мақұлдаған заң жобалары қатарына тағы бір өте маңызды құжат. Бұл Кодекс бойынша депутаттар жыл басынан бері көптеген отырыстар, талқылаулар өткізген. Заң жобасын талқылауға депутаттармен қатар, осы саладағы кәсіби мамандар, сарапшылар, ірі өнеркәсіп өкілдері және қоғам белсенділері қатысты.

Осы өзекті мәселені қорытындылау барысында Мәжіліс спикері Мемлекет басшысы Қасым-Жомарт Тоқаевтың Экологиялық Кодексті жыл соңына дейін қабылдау туралы нақты тапсырма бергенін еске салды. «Осыған орай, депутаттар осы саладағы проблемаларды шешуге, сонымен бірге, экологияны таза ұстауға, қорғауға, және табиғи байлықтарды сақтауға қатысты маңызды нормаларды енгізді, дей келе, жаңа Кодекстің заманға сай технологияларды пайдалана отырып, еліміздің экологиялық жағдайын жақсартуға арналған нақты қадам екеніне ерекше тоқталды.


Соңғы жаңалықтар