15:51, 16 Наурыз 2020 | GMT +6
Миллиардер Джек Ма Америкаға 1 млн маска сыйға тартты
НҰР-СҰЛТАН. ҚазАқпарат - Alibaba компаниясының негізін қалаушы Джек Ма АҚШ-қа медициналық маска мен коронавирусты анықтайтын тестілерді сыйға тартты, деп жазады ВВС.
Қытай миллиардері Twitter-дегі парақшасына Шанхайда тұрған жүк ұшағының фотосын жариялады. Бұған дейін ол Америкаға 500 мың тест пен 1 миллион маска сыйға тартатынын мәлім еткен еді.
«Джек Ма Еуропаға да бірқатар медикаменттер жіберіп жатыр. Ол пандемиямен күресу үшін халықаралық ынтымақтастыққа шақырды», - деп жазады ВВС.
Оның айтуынша, компания Жапония, Оңтүстік Корея, Италия, Иран мен Испанияға да медикаменттер жеткізген. Сонымен қатар қазіргі таңда бүкіл Еуропаға тарату үшін 2 млн маска дайындап жатыр.
Айта кету керек, бұған дейін Microsoft компаниясының негізін қалаған Билл Гейтс пен әйелі Мелинда Гейтс вирустың таралуын тоқтатумен күресу шараларына 100 млн доллар бөлетінін хабарлаған еді.