Мәдениет және спорт министрі блогерлерді «Қазақ хандығының 550 жылдығы» мерейтойлық медальдарымен марапаттады
2015 жыл Қазақ хандығы құрылуының 550 жылдығын атап өтумен ерекшеленді. Бұл айрықша мерекені тойлауға еліміздің барлық азаматтары қатысып, республика бойынша 700-ден астам түрлі шаралар ұйымдастырылды. Бұл шараларды таратумен отандық және шетелдік БАҚ айналысты. Мерейтойлық іс-шараларды насихаттау жұмысына әлеуметтік желілер қолданушылары да белсенді қатысты, деп хабарлады Мәдениет және спорт министрлігінің баспасөз қызметі.
Блогерлермен кездесу барысында Арыстанбек Мұхамедиұлы бүгінгі таңда әлеуметтік желілер бейресми бұқаралық ақпарат құралдарының рөлін атқарып жатқандығына тоқталып кетті. Олар түрлі жаңалықтарды халықтың кең топтарына қолжетімді етіп, оларды қарапайым және барлығына түсінікті етіп жеткізеді.
«Қазақ хандығының 550 жылдығына арналған шараларды айшықтауға қатысқан еліміздің барлық блогерлеріне шексіз алғысымды білдіремін. Жыл бойы блогерлер жеке парақшаларының беттерінен бүкіл әлемге ұлттық тарихымыз, мәдениетіміз бен дәстүрлеріміз туралы баяндау және мыңдаған жазылушыларымен фотосуреттермен бөлісу арқылы қоғамда патриоттық сезім мен өз елі үшін мақтаныш сезімін ұялатуға атсалысты», - деді министрлік басшысы.
Сонымен қатар Жанна Ильичева, Аршат Ораз, Арыстанғали Сансызбаев және Серік Мәмбетов секілді қазақстандық блогерлер естелік мерейтойлық медальдармен марапатталды.