Қызылордадағы шыны зауытының маңынан 8 ілеспе зауыт салынады - Гүлшара Әбдіқалықова

None
None
НҰР-СҰЛТАН. ҚазАқпарат – Қызылордадағы шыны зауытының айналасында 8 ілеспе зауыт салынады деп жоспарланған. Үш зауыттың жобасы белгіленіп, бизнес құрылымына қатысты кәсіпкерлер қызығушылық білдіріп, құжаттарын дайындады. Бұл туралы Қызылорда облысының әкімі Гүлшара Әбдіқалықова «Apta» бағдарламасына берген сұхбатында айтты, деп хабарлайды ҚазАқпарат тілшісі.

«Қызылордадағы шыны зауытының құрылысы 70% аяқталды. Екі мәселе ғана қалды, олар: балқыту ваннасы мен күйдіру пеші. Қазіргі уақытта мамандармен келіссөздер жүргізіп жатырмыз. Біздің тарапымыздан оның айналасындағы инфрақұрылымын аяқтауға, вагондар келетін жолды жөндеуге дайынбыз. Ал қалған 30% жұмысы мамандар келген жағдайда біртіндеп бітеді. Біздің елімізге жылына бағасы 1 млн. доллар болатын шыны сырттан келеді екен. Егер өзіміздің зауытты іске қосатын болсақ, сол 1 млн. доллар бізде қалады. Сыртқа сатсақ – тағы да кіріс болады. Қазіргі уақытта біз өте жақсы мәселені көтердік. Осы шыны зауыттың айналасында 8 ілеспе зауыт саламыз деп жоспарлап отырмыз. Үш зауыттың жобасы белгіленіп, бизнес құрылымына қатысты кәсіпкерлер қызығушылық білдіріп, құжаттарын дайындап қойды. Мысалы, бір зауыт шыныдан ыдыс жасаса, екінші зауыт айна жасайды, ал үшінші зауыт құрылыста көп пайдаланылатын шыны талшығын шығарады. Осы үш зауыттың өзі 15-16 млрд. теңге инвестиция тартады», - дейді Қызылорда облысының әкімі Гүлшара Әбдіқалықова.

Сондай-ақ, ол «Шалқия» кен орнында қорғасын, мырыш өндейтін өндіріс орны салынатынын айтты.

«Шалқия» кен орнында да қорғасын, мырыш өндейтін өндіріс орны салынайын деп жатыр. Қазіргі уақытта «Самұрық Қазынамен» бірге жұмыс істеп жатырмыз. 8 млрд. теңгеге жуық инвестиция тартылып, жұмыс басталады. Одан басқа, Арал өңірінде кальцилендірілген сода өндітерін зауытының барлық құжаттары дайын. ҚР Экология министрлігіне шлакты сақтайтын орынға қатысты сұрақтар болған. Ол мәселені толық шештік. Кәсіпкерлер жұмысты бастауға әзір», - дейді ол.


Соңғы жаңалықтар