Қызылордада төтенше жағдай кезінде қылмыс азайған
Елімізде төтенше жағдай жарияланған 16 наурыздан бері Қызылордада барлығы 341 қылмыс тіркелген. Оның ішінде меншікке қарсы жасалатын қылмыстар 65 процентке төмендеген. Яғни ұрлық 60, тонау 20, қарақшылық 50 процентке төмен түсті. Ал қоғамдық орындарда жасалатын бұзақылық қылмыстары 67 процентке азайды. Зорлау және ауыр дене жарақатын салу қылмыстары тіркелмеген.
«Төтенше жағдай кезінде тиісті түсіндіру жұмыстары ұдайы түрде жүргізілуде. Соған қарамастан облыстың кейбір тұрғындары тарапынан короновирус инфекциясына таралуы туралы жалған ақпарат таратудың 11 дерегі тіркелді. Оның біреуі негізінен қарау үшін сотқа жолданса, қалған қылмыстық істер бойынша қысқа мерзімде тиісті процестік шешімдер қабылданды.Оған қоса, COVID-19 диагнозы қойылған адамдардың жеке деректерінің таратылуының 2 дерегі бойынша сотқа дейінгі тергеп-тексеру басталды», - деп мәлім етті Қызылорда облысы прокурорының бірінші орынбасары Талғат Әлібаев.
Қазір Қызылорда облысында коронавирус инфекциясын жұқтырған 66 адам бар .