Қызылордада бүгін тіркелген 4 науқас коронавирустық инфекцияны қайдан жұқтырды
Бұл туралы Қызылорда облыстық денсаулық сақтау басқармасының басшысы Жақсылық Абдусаметов мәлім етті.
«Қызылорда облысында коронавирус инфекциясы бойынша 9 жағдай тіркелген. Бүгін зертханалық сынама негізінде тағы 4 адамнан аталған диагноз анықталды. Олардың барлығы бұдан бұрын тіркелген науқастармен қарым-қатынаста болған. Бұл азаматтар соған байланысты карантинге алынып, оқшауланған болатын. Олардан алынған зерттеу оң нәтиже көрсетті. Науқастар стационарға, ем алу мақсатында жатқызылды. Аталған азаматтармен қарым-қатынаста болуы мүмкін адамдардың тізімі нақтыланып жатыр. Алдағы уақытта ол азаматтар да оқшауландырылады. Бүгінгі таңда облыстың ауруханаларында ем алып жатқан науқастардың жағдайы бірқалыпты, емдеу жалғасуда», – деді Жақсылық Абдусаметов.
Қызылордада 28 наурызда коронавирус жұқтырған алғашқы адам тіркелсе, 29 наурызда ол науқаспен қарым-қатынаста болған медбикеден де сол диагноз анықталды. 30 наурызда коронавирус жұқтырған тағы үш науқас нақтыланды.
Сондай-ақ, Қызылорда облысының әкімі Гүлшара Әбдіқалықова облыс тұрғындарына үндеу жолдады.