15:54, 15 Шілде 2017 | GMT +6
Қырғыз Үкімет басшысы президенттікке кандидат ретінде ұсынылды
АСТАНА. ҚазАқпарат - Қырғызстанның социал-демократиялық партиясы (ҚСДП) бүгін Бішкекте өткен съез барысында қазіргі премьер-министр Сорронбай Жээнбековтің кандидатурасын Қырғызстан Республикасының президенттігіне ұсыну туралы шешімді жария етті, деп хабарлайды ҚазАқпарат kabar.kg сайтына сілтеме жасап.
Дауыс беру қорытындысына сәйкес, Сорронбай Жээнбековтің кандидатурасы үшін съездің 674 делегаты бірауыздан дауыс берді.
Съез шешімі бойынша, ҚСДП Сорронбай Жээнбековті партияның атынан президент сайлауына түсетін жалғыз үміткер ретінде таңдады.
Өз кезегінде, Жээнбеков осындай қолдау үшін алғыс айтып, оған артылған сенімді ақтауға бар күш-жігерін салатынын жеткізді.
Айта кетейік, Қырғызстанда президент сайлауы ағымдағы жылдың 15 қазаны күні өтеді. Қазіргі таңда президент сайлауына қатысуға Қырғызстанның 26 азаматы ниет білдірген.