Күрес түрлерінен ӘЧ: Әйелдер күресінен алғашқы медальге қол жеткіздік

Бүгін әйелдер күресінен 50 келі салмақта қола медаль үшін белдескен қазақстандық Валентина Исламова кіші финалда украиналық Оксана Ливачты 5:0 есебімен ұтып, қола медаль иегері атанды.

Бұл күрес түрлерінен қазақстан қоржынына түскен төртінші медаль. Осыған дейін осыған дейін Қазақстан құрамасынан 55 келі салмақта грек-рим күресінің шебері Қорлан Жақанша ел қоржынына алғашқы күміс жүлдені сыйласа, сол күні Алмат Кебіспаев қола медаль жеңіп алған болатын. Ал кеше ғана грек-рим күресінен ерлер арасында 60 келі салмақта ел намысын қорғаған балуанымыз Мейрамбек Айнағұлов кезекті қола медальге қол жеткізді.

Сондай-ақ, бүгін қола медаль үшін белдесуде 55 келі салмақ дәрежесінде сынға түскен жерлесіміз Марина Седнева ресейлік Ольга Хорошавцевадан ұтылып, жүлдесіз қалды. Жүлделі орынға таласқан 72 келі салмақтағы тағы бір отандасымыз Жәмила Бақбергенова жапондық қарсыласына 0:2 есебімен ұтылды.

Осылайша әлем біріншілігінде әйелдер күресінен қазақстандық балуандардың еншісінде әзірге жалғыз қола медаль бар.