ҚР Президентінің Германияға сапары екі ел арасындағы ынтымақтастыққа оң әсерін тигізді – Гюнтер Кнабе
Қасым-Жомарт Тоқаев 5-6 желтоқсанда Берлин қаласында ГФР басшысымен, белгілі неміс саясаткерлерімен және бизнес өкілдерімен кездесті.
«Берлин Еуразиялық клубында Қасым-Жомарт Тоқаевтың неміс бизнесмендерімен кездесуі сәтті өтті», - деп жазды Гюнтер Кнабе «ҚазАқпарат» ХАА-ның сұрау хатына.
Жұма күні Берлин Еуразиялық клубының 28-ші отырысында Мемлекет басшысы неміс бизнесі үшін ерекше жағдай жасалғанын мәлімдеген болатын.
«Отырысқа қатысқан 400-ге жуық адамның көпшілігі – неміс кәсіпкерлері. Олар ел Президентінен бүгінгі Қазақстан туралы, Германияның экономикалық мәселелері мен мүмкіндіктері туралы ақпарат алды», - деп атап өтті саясаттанушы.
Қазақстан басшысы неміс бизнесін ел экономикасына салынатын инвестицияны арттыруға шақырды.
«Қасым-Жомарт Тоқаевтың кездесулері Германияның Қазақстандағы алдағы экономикалық қызметіне айтарлықтай оң әсерін тигізеді», - дейді сарапшы.
Екі күндік сапар барысында жалпы сомасы 2,4 миллиард долларды құрайтын 30 қазақ-герман экономикалық құжатына қол қойылды.
«Германия экономикасы Қазақстанның маңызын мойындайды және оған артып келе жатқан қызығушылықты көрсетеді», - деп сөзін қорытындылады сарапшы.
Автор: Тимур Дүйсекеев
Фото: www.dw.com