Қостанайда вагондағы тауарды ұрлаған теміржолшылар ұсталды
Департаменттің баспасөз қызметі таратқан ақпаратқа сәйкес, Қостанай стансасындағы желілік полиция бөліміне жергілікті жауапкершілігі шектеулі серіктестердің бірінің өкілі шағымданып келген. Оның айтуынша, «Қытай халық республикасы - Қостанай» бағытында келе жатқан жүк пойызы вагондарының бірінен бадам жаңғағын (миндаль) салынған 75 қорапты белгісіз біреулер ұрлап кеткен.
«Көлік полицейлері жедел-іздестіру іс-шараларын жүргізу барысында бес ер адамды ұстады. Тексеру барысында олардың Қарағанды облысынан екені анықталған. Олардың бәрі теміржол ұйымының қызметкерлері болып шықты. Ксәпкерге 590 759 теңге шығын келген. Жауап алу кезінде күдіктілер кінәларын мойындады», - делінген департаменттің ақпаратында.
Қазіргі уақытта айғақ заттары компанияға қайтарылды. Қазір тергеу амалдары жүргізілуде.